Die matriektoer het sy ontstaan te danke aan ‘n groep ouers en onderwysers wat gevoel het dat hulle vir ons matrieks iets baie spesiaals en besonders in hul matriekjaar wil aanbied. Meneer Carel Greyling (ouer) wat vroeër onderwyser was in die Oos-Vrystaat, het toe met die gedagte van ‘n matriektoer na die Drakensberge in Natal gekom.  In Maart 1982 het die eerste matriektoer na die Drakensberge vertrek.

Vanuit die staanspoor was daar duidelike doelwitte met die toer gestel:

1. Dit moet ‘n unieke toer wees in die sin dat die leerders uit hul bekende omgewing na ‘n totaal onbekende omgewing geneem moet word.Die gedagte was ook dat die leerders iets moet beleef wat hul nog nooit vantevore beleef het nie en ook nie gou in hul lewens sou beleef nie.
2. Die toer moet opvoedkundig van aard wees.
3. Aktiwiteite waaraan die leerders  deelneem,  moet van so ‘n aard wees dat almal daaraan kan deelneem en nie net die sportmanne en –vroue nie
4. Die klem van die toer moenie op besigtiging val nie, maar eerder op deelname
5. Uitdagings moet aan die leerders as ‘n groep gestel word
6. Die groepsgevoel onder die matrieks moet baie sterk beklemtoon word.